資料庫

性工作與condom -- 安全套自白

大家好！我係安全套，英文名叫condom，台灣人好似比較習慣稱呼我做保險套。好多人鍾意親切啲，叫我做 dom, 或者再cute 啲，叫我dom dom, 亦有人一見到我個樣，就好鬼直接咁叫我做「袋」。

其實叫咩無乜大所謂，最緊要唔好仲用上世紀叫法，叫我做避孕套。大家要搞清楚，我實在是多功能集於一身，除咗避孕，我存在嘅另一極大意義就係保障大家安全。男男女女男女女男都好，有性行為嘅時候唔好唔記得我，check過我無穿無爛無過期，就放心俾我為你哋服務，為你阻隔可以透過性接觸傳播嘅病毒同細菌，同埋喺男女之間發揮避孕功效。

我同性工作者固然關係密切，佢哋開工一定預埋我，但到宜家佢哋有啲客人仍然固執地認為我會令佢哋無feel，會傻到偷偷地整爛我，或者將我拎走，丟埋一邊，真係好想同佢哋講：「你可摸耳唔好咁自私?」

除咗商業性活動，唔牽涉金錢嘅性關係唔代表就可以無咗我，性傳染病同意外懷孕嘅風險，係唔會因為關唔關錢事而變大或者變細㗎！

做得condom，就預咗被人用完即棄，呢個係我嘅使命，完全接受無難堪。用完我之後，用張紙巾包住我，送我入垃圾桶我ok㗎！但係千祈千祈唔好送我入馬桶，去到裡面萬一沖唔走，唔上唔落塞住咗，你好麻煩時我亦好難受。記得啦！